കവിത/ മൗനം ; ഒരു വാദ പ്രതിവാദം

മൗനം ; ഒരു വാദ പ്രതിവാദം 

"മൗനം  ഭീരുത്വമല്ല 

അധികാര ഗർവിന്  നിഷ്ക്രിയത്വം 

പതിച്ചു നല്കുന്ന അനുമതിയുമല്ല.

കേട്ടിട്ടില്ലേ മൗനം  വിദ്വാന്  ഭൂഷണമെന്ന് 

ആസക്തികളുടെ ചുടലയിൽ നിന്ന് 

വാരിക്കൂട്ടിയ  കനലുകളാണതിൽ 

പാടിപ്പതിഞ്ഞ വീര ഗാഥകളുടെ

ഈണവും താളവും, 

എഴുതിത്തഴഞ്ഞ തൂലികത്തുമ്പിന്റെ 

തിളക്കമുടയ മൂർചയുമുണ്ട് .

പക്ഷെ ഊതിപ്പടർത്തി വിടാൻ 

കെൽപ്പുള്ള കോപ്പ് തിരയുകയാണ് "

എന്തൊക്കെ പറഞ്ഞാലും 

മാഷെ, അത് ഭീരുത്വമാണ് .

കൂട്ടത്തിലൊരുത്തനെ  വെട്ടി വീഴ്ത്തിയപ്പോഴും 

അമ്മയെത്തന്നെ വ്യഭിചരിക്കുന്നെന്നാലും 

സൂക്ഷിക്കുന്ന ഈ അടക്കമുണ്ടല്ലോ 

പേടിച്ച്  പേനത്തുമ്പിൽ അടപ്പിടുന്ന 

നിങ്ങളുടെ സാംസ്‌കാരിക സംയമനം

അതാണ്  മാഷെ മരണം. 

അതുകൊണ്ടാണ്  നെറികേടിന്റെ കൊടിപിടുത്തം 

ഞങ്ങളുടെ റേഷൻ  സഞ്ചികൾ വരെ തുളച്ചത് 

നിങ്ങൾ തിരയുന്ന കോപ്പ്  ഇവിടെയുണ്ട് 

മരിച്ചാലും മൗനിയാകാത്ത ഒരു മനസ്സ്‌